2017年1月29日 星期日

2017北京寶樹堂,同仁堂,絲綢館,玉器店,足底按摩購物景點分享


近期懶蟲上身,休息咗好耐,懶得動手。
不過,心入面一直催促著自己,仲有一件事未做,就是呢個北京購物團的記錄。寫什麼好呢?就寫購物吧!

一般人在揀大陸團時都有我這般的困惑,究竟是揀一個既有足夠行程,又平,但加插購物景點的平價團,還是揀一個貴多二千銀,其餘都差不多的純玩團呢?
我揀咗前者。
以下,就是我參加北京購物團的記錄:
旅行社:新華旅遊
團費:HK$2388
天數:5天 (年二十八至年初二)
住宿:北京北辰洲際酒店 (5星)
航空公司:國泰港龍航空
坦白講,呢個Peak time坐港龍去北京,單是來回機票也不止這個價,而且酒店在Agoda網上價每晚約8百元港紙左右(包早餐),跟購物團去北我真係無理由唔揀購物團。
接著的問題是,購物團會不會迫你購物?
答案是不會的。
我私下問過領隊,團友購物,會否影響你的佣金,她說不會,買不買隨你。
不過,仲有一個大陸導遊,我諗都幾關佢事,因為有一次我哋全團無買到嘢,佢嗰日就無表情,無耐性,你哋有咩要求都唔會滿足你。

北京嘅景點大家應該好熟悉,故宮,天坛,長城,頤和園……在二十年前去遊覧,應該還值得去欣賞,可惜,宜家受惠於國家污染嘅高速發展,再好的景色都沉沒在霧霾裡(至少冬季係咁),北京,只是一個到此一遊的地方。

因此,我這遊記只集中介紹幾個購物景點,俾大家多點警惕。

一、寶樹堂
出血指數 :☆☆
一個賣藥的地方,最出名係止痛貼,一罐二百元, 若嫌唔算貴嘅話,仲有潤膚膏, 刮痧梳,全部不過一千元。停留大約一小時,唔會感覺hard sell。

二、絲綢廠
出血指數:☆☆
一個打正旗號話以廠價銷售真絲綿被嘅地方,綿被680元起,嗰sales話香港一定賣double喎!
我哋參觀時,撞正另外兩個香港團,永安同縱橫遊,我諗呢到應該國家指定外貿推廣購物點喇。
可能我哋團友屋企什麼都不缺,嗰日我哋無買嘢,而個北京導遊起嗰日就表現到十分不耐煩,有什麼要求都唔係幾啋你,之後去頤和園都淨係比半個鐘時間參觀!

三、同仁堂
出血指數:☆☆☆
導遊先生講同仁堂係幾個購物景點中,最值得去的地方。
我哋去到,先有一個講廣東話嘅醫師同團友介紹一下中醫嘅歷史,之後,再出現好幾個有相當年紀嘅中醫,話免費幫各位團友把脈。
我哋就當去咗算命咁,睇下佢講得有幾準。
睇我嗰個中醫又好似講中少少point, 問我家中是否有人有糖尿病,咁啱我婆婆,媽媽都係,我就信下佢,買咗一個月藥,RMB680, 香港睇兩次西醫都差唔多啦!
返嚟食咗半個月,又好似有改善到,血氣面色都好咗。
之不過,我老爺俾另一個老中醫睇,都算中point,買咗一個療程,三個月藥,二千幾,但食咗一個星期就覺得身體唔接受,之後無再食喇!

四、玉石鋪
出血指數:☆☆☆☆
玉石鋪係最後一日的上午行程,對,係整整一上午!
因為我前一晚就知道午飯嘅餐館在酒店附近,我哋一家人就同導遊領隊講,要求離團,佢哋又ok,咁我哋就瞓到8點先落去食早餐,再退房離開酒店(因為最後一日,領隊要一早退房,我於是提早一晚落去前檯, 預付我兩間房嘅按金,咁就就可以正常時間退房喇)。
其實以上應該同玉石店無咩關係,不過我想分享係,在沒有什麼行程的情況下,導遊都要求我哋8:15離開酒店,直到12點先去到午飯地方,中間完全係購物時間,唔購物真可能會好悶,所以一定要嘗試反抗。
而在玉石店,我哋有好幾個團友都有所收穫,由過千到上萬都有。
其中一個團友買咗一隻玉鈪,佢話開始時標價30萬,佢試都唔敢試,但係嗰sales係咁叫佢試上手,跟著話真係好襯佢,幫佢攞咗各樣折扣之類,最終2萬蚊成交。
我見佢都好仲意隻鈪,唔可以話俾人呃,千金難買心頭好,而且玉器呢樣嘢真係好難衡量價值,只可講,裡面嘅標價真係好夢幻,僅記如果有興趣,要狠狠殺價!

五、脚底按摩 - 北京工人體育館
出血指數 : ☆☆☆☆☆
原來脚底按摩都係一個購物點。我哋午飯後,上機前的時間過去。
導遊講,按完脚俾二十元小費就可以。
實情是,俾二十元佢哋就唔係幾高興,五十,一百,面容許就會寬容一點。
同埋佢哋應該無找錢嘅習慣,幾大張都當tips,照收無誤,所以入去前記得準備好小費!
不過以上都仲係小兒科,幫我哋按脚嘅按摩員有兩種,一種係後生精靈嘅,另一種係大嬸級嘅。
如果遇著有點似起鄉下出嚟嘅大嬸級,恭喜你,你可以全程舒服咁享受純正的脚底按摩,俾30,50元小費,佢哋都會給你一個正常的笑顏。
而遇著後生精靈嗰幾位就麻煩小小喇,佢哋會係咁同你傾計,sell下其他服務,跟著仲會話從隻脚到睇邊到唔係幾健康,不如請個駐場嘅醫生幫佢哋睇下。
年紀大小小嘅長者當然或多或少筋骨無咁好,個醫生就有咁大煲咁大,講到影響好大咁,然後叫老人家買浸脚粉返去浸脚,一個療程6千幾人民幣。-_-#。。。。。
做子女嘅雖然心知可能係搵笨,但見到老人家相信,唔出錢都唔好意思出聲阻止,結果,又係幾千銀!
至於功效如何?要浸成半年嘅藥,恆心本來就係一大問題,無日日浸 ,無效果又有咩出左出奇呢?!而且日日浸都唔保証有效啦,係咪?!
以上五個都係一般北京團會去的購物點,我寫出嚟分享,都係希望大家如果參加類似旅行團時有少少心理準備,特別帶老人家去時,佢哋多類成為目標,後生嘅就比較難落手。
不過觀光購物團一般所受限制比較多,例如每天要求8:15離開酒店,展開行程,那怕當日只剩低兩個購物景點,再好的酒店,也不能好好享受。又有如真正的景點只給予半小時參觀,購物景點却長達一兩小時,比例極不合理,可以自遊行當然自遊行好! 但是大時大節,機票價錢隨時貴過團費,要怎樣揀,大家考慮考慮吧!

不過,唔係一定咁被動,我建議可以在適當的時候離團,反正現在微訊滴滴打車很方便,前提係你可以微訊付款,自己安排自己行程,才有旅行的樂趣!

沒有留言:

張貼留言